बालअधिकार संरक्षणमा सरकार प्रतिबद्ध छ: मन्त्री भट्टराई

नवलपरासी पूर्व । शिक्षा, विज्ञान तथा प्रविधिमन्त्री विद्या भट्टराईले बालबालिकाहरूको समग्र विकास र संरक्षणमा सरकार प्रतिबद्ध रहेको बताएकी छिन् ।

नवलपरासी (बर्दघाट सुस्ता पूर्व) को देवचुलीमा आज आयोजित ‘बालिका अधिकार संरक्षणमा सरोकारवालाको भूमिका’ विषयक अन्तरक्रिया कार्यक्रममा मन्त्री भट्टराईले अधिकार स्थापित गर्न गुणस्तरीय शिक्षा आवश्यक पर्ने भएकाले राज्यका तर्फबाट निःशुल्क शिक्षाको पूर्ण कार्यान्वयनका लागि गृहकार्य सुरु गरिएको बताए ।

'विद्यालयमा खुवाउने गरेको दिवा खाजाको गुणस्तरीयता र पोषणका लागि स्थानीय सरकार, विद्यालय र समुदायसँग मिलेर काम गरिने छ', उनले भने, 'परम्परागत र स्थानीय खाद्य सामग्रीको प्रयोग हुने गरी दिवा खाजालाई व्यवस्थित, गुणस्तरीय बनाउनुका साथै स्थानीय स्तरको समग्र कृषि प्रणालीलाई सहयोग पुग्नेछ ।'

उनले प्याड अभावका कारण विद्यालय शिक्षाबाट वञ्चित हुनबाट रोक्ने सरकारले काम गर्ने बताए । उनले भने, 'प्याड अभावका कारण विद्यालय शिक्षाबाट वञ्चित हुनबाट रोक्न सरकारले काम गर्ने छ ।'

अन्तरक्रिया कार्यक्रममा देवचुली नगरपालिका उपप्रमुख पार्वता तिवारी, जागृति बाल तथा युवा सरोकार नेपालका अध्यक्ष तिलोत्तम पौडेल, गण्डकी प्रदेशका १० जिल्लाका ३० भन्दा बढी स्थानीय तहका महिला जनप्रतिनिधि, नगरप्रमुख, उपप्रमुख, गाउँपालिका अध्यक्ष, उपाध्यक्ष, वडाध्यक्ष र कार्यपालिका सदस्य एवं अन्य सरोकारवालाको उपस्थिति थियो ।