काठमाडौँ । नेपाली कम्युनिस्ट पार्टीले सरकारले कुनै पनि कदम चाल्दा सरकारले विधिको शासन, कानुनी प्रक्रिया र निष्पक्षताको मान्यता उल्लङ्घन गर्न नहुने धारणा राखेको छ। नेकपाले शनिबार विज्ञप्ति जारी गर्दै मन्त्रिपरिषद्को पहिलो बैठकबाट भदौ २३ र २४ गतेको घटनाको छानबिन गर्न गठित कार्की आयोगको प्रतिवेदन कार्यान्वयनका सन्दर्भमा चालेको कदमप्रति पार्टीको गम्भीर ध्यानाकर्षण भएको बताएको हो।

भदौ २३ गतेको जेनजी आन्दोलनका क्रममा हेलचेक्र्याइँ गरेको अभियोगमा प्रहरीले पूर्वप्रधानमन्त्री एवम् नेकपा एमालेका अध्यक्ष केपी शर्मा ओली र पूर्वगृहमन्त्री रमेश लेखकलाई शनिबार बिहान पक्राउ गरेको थियो। सरकारले प्रतिशोधी व्यवहार देखाएको भन्दै एमाले आन्दोलित छ। 

नेकपाले पनि आफ्नो धारणा सार्वजनिक गरेको हो। '२०८२ फागुन २१ गते सम्पन्न प्रतिनिधिसभाको निर्वाचनबाट बहुमत प्राप्त दल राष्ट्रिय स्वतन्त्र पार्टीका नेता श्री बालेन्द्र शाह प्रधानमन्त्री नियुक्त हुनु भएको र उहाँको नेतृत्वमा मन्त्रिपरिषद् गठन भएकोमा हाम्रो पार्टी नेपाली कम्युनिस्ट पार्टी बधाई ज्ञापन गर्दै शुभकामना व्यक्त गर्दछ', नेकपाले विज्ञप्तिमा भनेको छ, 'साथै सरकारले मन्त्रिपरिषद्को पहिलो बैठकबाट भदौ २३ र २४ गतेको घटनाको छानबिन गर्न गठित कार्की आयोगको प्रतिवेदन कार्यान्वयनका सन्दर्भमा चालेको कदमप्रति हाम्रो गम्भीर ध्यानाकर्षण भएको छ। यस सन्दर्भमा हाम्रो पार्टी कुनै पनि कदम चाल्दा सरकारले विधिको शासन, कानुनी प्रक्रिया र निष्पक्षताको मान्यता उलङ्घन नगरोस्। राजनीतिक पूर्वाग्रह राख्ने तथा द्वन्द्व सिर्जना हुने कार्य नहोस् भन्ने आग्रह गर्दछ।'

हेर्नूहोस् विज्ञप्ति: