प्रतिनिधि सभा विघटन गरेकोप्रति सभामुख घिमिरेको असन्तुष्टि

ShabdaNews
२ असोज २०८२, बिहिबार

तस्बिरः संसद् सचिवालय

काठमाडौँ । सभामुख देवराज घिमिरेले प्रतिनिधि सभा विघटन नगरी समाधान खोजिएको भए राम्रो हुने बताएका छन् ।

गत भदौ २४ गते आगजनीबाट क्षतिग्रस्त संसद् भवनको बिहीबार अवलोकन गर्दै सभामुख घिमिरेले प्रतिनिधि सभा विघटन नगरी समस्या समाधान गरेको भए राम्रो हुने बताएका हुन् । 'प्रतिनिधि सभा विघटन नगरी यसभित्रबाट समाधान खोजिन सकिएको भए राम्रो हुन्थ्यो,' उनले भने ।

सभामुख घिमिरेले संसद् भवन, सिंहदरबार लगायतका सार्वजनिक भवनमा आगजनी र तोडफोडको घटना हुनु दुःखद रहेको बताए । 'जे घटना भयो र अहिले जे बेहोरिरहेका छौँ यो ज्यादै दुःखद कुरा हुन् । यसबाट उठेर ठिकसँग जानुपर्ने सबैको दायित्व हुन्छ । सबै लागौँ,' उनले भने, ' दुर्घटनाहरू नुहुनुपर्थ्यो । समस्याहरूलाई राम्रो ढंगबाट समाधान गर्ने बाटाहरू खोज्न सकिन्थ्यो । खोजिन्थ्यो । त्यो हुन सकेन यो दुःखद घटना भयो ।'

उनले अन्तरिम सरकारको अगाडि ठुलो जिम्मेवारी रहेको र ती समस्या समाधान गरेर अगाडि जान सक्नुपर्ने बताए । उनले भने, 'हेर्न नसकिने, भन्न नसकिने दुःखद दृश्यहरू धेरै छन्। गम्भीर क्षति भएको छ। यसलाई उठाउन आम मान्छे, आम क्षेत्र सबै लाग्नुपर्छ ।'